«WORLDSKILLS» - жұмысшы мамандығының беделін арттыру құралы
20-31 қаңтар аралығында Қызылорда облысының техникалық және кәсіптік білім беру ұйымдарында «WorldSkills-2025» чемпионатының колледжішілік іріктеу кезеңдері өтті.
Облыс бойынша 18 құзыреттілік бойынша 200-ден астам білім алушы бақ сынасып, сайысты 50-ге жуық сарапшы мамандар бағалады.
Білім алушылар «Графикалық дизайн», «Веб технологиясы», «Кондитер ісі», «Аспаз ісі», «Наубайхана ісі», «Кірпіш қалау», «Дәнекерлеу технологиясы», «Жеңіл автомобильдерді жөндеу және қызмет көрсету», «Сән технологиясы», «Құрғақ құрылыс және сылақ жұмыстары», «Плиткамен қаптау», «Шаштараз өнері», «Жүйелік және желілік әкімшілендіру», «Электромонтаждық жұмыстар» және тағы да басқа құзыреттіліктер шеңберінде өз білімдерін, дағдыларын ортаға салып, болашақ білікті маман ретіндегі біліктіліктерін көрсетті.
«WorldSkills» - сайыс арқылы жұмысшы мамандықтарды популяризациялауды мақсат еткен халықаралық қозғалыс. Қазіргі уақытта жұмысшы мамандықтарына қызығушылықты арттыру мақсатында бұл сайыстардың маңызы аса зор. Себебі WorldSkills – бұл жай сайыс емес, бұл мамандықты дәріптеу, оның мүмкіндіктерін көрсету, сонымен қатар бұл мамандық таңдауға бағдар беруші құрал. Жұмыс берушілер қатарынан құралған сарапшылар жұмысшы мамандарының қалай дайындалып жатқанын өз көздерімен көріп, әділ бағаларын берді. Кәсіпкерлер палатасы өз тарапынан сайыстың өткізілуіне атсалысып, қолдау көрсетуге әрдайым дайын», - деді Палатаның сарапшысы М.Қасымжан.
Колледжішілік іріктеуден өткен білім алушылар сайыстың облыстық кезеңіне жолдама алып, дайындықтарын бастап та кетті. Осы ретте, барша қатысушыларға сәттілік тілейміз.
Пікір қалдыру:
Пікірлер: