«Атамекен» Қазақстан Республикасының Ұлттық кәсіпкерлер палатасы
Бизнестің сенімді серіктесі

Ақтөбеде «Іскерлік байланыс» жобасы аясында кәсіпкерлерді оқыту басталды

14 Қазан 2019 - Ақтөбе облысы
682 просмотров

Жоба аясында 40-тан астам ақтөбелік кәсіпкер тегін оқуға және шетелдік тағылымдамадан өтуге мүмкіндік алды

«Іскерлік байланыс» жобасы «Бизнестің жол картасы 2020» бағдарламасы шеңберінде жүзеге асырылады және экономиканың басым секторларында өз қызметін жүзеге асыратын шағын және орта кәсіпкерлік субъектілеріне қолдау көрсетуге бағытталған.  Жобаға шетелдік серіктестермен іскерлік байланыстар орнатуға қызығушылық танытқан жоғары және орта буынды компаниялардың басшылары қатыса алады. Жобаның операторы – «Атамекен» ҰКП.

«Іскерлік байланыс» жобасының бірінші кезеңі өңірлік деңгейде өтеді – мұнда кәсіпкерлер үшін тренингтер мен семинарлар ұйымдастырылады. Бизнес-тренерлер болып сертификатталған мамандар шақырылды. Мысалы, бизнес-тренерлердің бірі – Айнұр Қалмағамбетова. Ол сату және сервис саласында 20 жылдық тәжірибесі бар сарапшы-практик. Айнұр Қалмағамбетова ақтөбелік кәсіпкерлермен «Маркетинг. Клиентке бағдарлау. Бизнес-жобаларды қаржылық қамтамасыз ету. Техникалық-экономикалық негіздеме. Қаржылық-экономикалық негіздеме» тақырыптары бойынша семинарларды бастайды.

«Курс барысында біз кәсіпкерлерді өз бизнесін тиімді басқаруға, мақсаттарды дұрыс қоюға, осы мақсатқа жету бойынша қадамдарды жазуға үйретеміз. Олар өздерін мемлекеттік экономика тұрғысынан көріп, бүкіл әлемде қолданылатын бизнесті цифрландыру және әлеуметтік желілер сияқты жаңа құралдарды пайдалануды үйренеді», – деп атап өтті кәсіпкерлер Палатасының сарапшысы Динара Смамутова.

Семинарлар тегін өткізіледі. Семинар аяқталғаннан кейін қатысушылар ҚБТУ және «Атамекен» ҰКП-дан курстарды сәтті аяқтағаны туралы сертификат алады және кейіннен Германияға сапар үшін бағдарламаның екінші кезеңін конкурстық іріктеуге қатыса алады. Екінші кезеңде шетелдік бизнес-тағылымдамадан өтуге ең белсенді, табысты және бизнес-жоспарын ұсынатындарды іріктейді. Сонымен, бір ай ішінде қатысушылар ұқсас бейіндегі шетелдік кәсіпорындарда болады және шетелдік әріптестермен іскерлік байланыстар орната алады. Екінші кезең Германияда өтеді.

«Осының жарқын үлгісі Ақтөбе қаласының жас кәсіпкері Арман Сәкішев болып табылады. 2017 жылы ол білім алушылар тобына түсіп, Германияға барып, сандық стоматология саласында тәжірибе алды. Сандық зертхананы жеткізу үшін технологиялар мен медициналық жабдықтардың негізгі өндірушісімен шарт жасасты: адамның қатысуынсыз тіс каптарын модельдеу және дайындау. Нәтижесінде «Dental-centre» ЖШС стоматологиялық клиника желісінің жетекшісі өткен жылы сандық стоматологияны ашты», – деді кәсіпкерлікті қаржылай емес қолдау бөлімінің басшысы Диана Джумабаева.

Ақтөбеде оқу үш апта жалғасады. 14-23 қазан аралығында-күндізгі оқу, 24-29 қазан аралығында оnline-семинарлар. Осы уақыт ішінде жобаға қатысушылар он екі бизнес-жаттықтырушылармен жұмыс істей алады. «Іскерлік байланыс» жобасы бойынша оқыту Ақтөбе облысының кәсіпкерлер Палатасы базасында өтеді.

Пікір қалдыру:

Пікірлер:

Серіктестер